Kumthar Thuchah

-Thanzuali chenkual

ITI Corps huamchhung a ka Sipaipui Member zawng zawngte kumthar chibai ka buk che u. Chaklo hle mah ila, kumthar min hlangkaitu Pathian avangin kumthar thuchah ka’n tarlang duh a ni. Israel Lal Ahaba hnenah Lalpa’n Zawlnei kaltlangin he Thu pawimawh tak hi asawi a “inti chak sauh sauh ula, i tihdan tur ngaihtuah rawh”(Lalte 20:22). Israel-te hi Kanan an luhhnu thleng hian, Lal leh Lal, Hnam leh hnam chu indonain an inhmachhawn reng a, an chanchin hi a ngaihnawm hle anih kha.
Pathian Zawlnei thuhrilh :
1-na : Tih tur leh tihloh tur ahrilh thin.
2-na : Chuvang chuan Pathian an tih hle thin a, a remtih loh zawng chuan engmah an ti ngam ngailo. Keini pawh hi, kan Raldolaite min hnehsak fo thin, mak tak maiin Israel-te pawh hi an Raldo alo hnehsak fo tawh thin. Kum alo thar a, hmalatu tur leh Hruaitu tur tam takte hlan thar an ni leh ta a. Hengte hi malsawmna kan dawnna tur thar an ni thin. kan Pathian tana hmalatu turte kan nih avangin theihtawpin hma kan la tur a ni. Lalpa Ram zauhnana thawk tur kan nih avangin i inti chak sauh sauh ang u.
Abik takin Pathian thu a min kaihruaitute hian, kan awmdan turah hian kan fimkhur angai leh zual a, kan Pathian chuan, thil sual tih chu sawiloh sual anga lang pawh langlo turin min zirtir anih kha. Zuk leh hmuamte pawh hi bansan vek turin minti si a, Kohhran dangte pawhin athatloh zia hriain zuk leh hmuam laka fihlim turin an inzirtir nasa tawh si a, keini Sipai zawk phei chuan kan sim vek ahun tawh hle a ni. Sual Setana hian kan panna lai leh thlemthluk kan awlna lai hi a hre em em a, chuvangin, Sipaite hian kan hnehzel theihnan leh chakna kan chan zel theihnan Israel-te’n Pathian an tih thin dan ang khan i tih ve ang u.
Keini Israel tharte hian kan Lalpa thu hi uluk takin kan zawm ve tur a ni a, Pathian thu chuan “he Khawvel dan ang hian awm suh ula, Pathian duhzawng lawmtlak ni turin, in Taksa chu inhlanah ka ngen che u a ni” ati a. Pathian thu ang hian awm theuh ila, a malsawmna pawh kan dawng nasa zawk ngei ang. Pathian thu anga kan nungzel theihnan Lalpa’n min kaihruai zel rawhse.