Article

TAWNGTAINA

-Ben apa
(II Chro 7 : 14 & 15) ‘Ka hmingpu ka Mite chuan inngaitlawma an tawngtai a, min zawn a, an awmdan sualte an hawisan chuan, van atangin ka lo ngaithla anga, an sualte ka ngaidam anga, an Ram chu ka tidam leh ang. He hmuna tawngtainaah hian ka Mit ka len anga, ka Beng ka chhi ang.’ (Mathaia 7 : 7) ‘Dil rawh u, tichuan ape angche u, zawng rawh u, tichuan inhmu ang. Kik rawh u, tichuan an hawnsak angche u.’
tawngtai hian thil atih theihziate, a pawimawh ziate, pathian kan koh eina leh kan inzawmna a nihziate tarlan tur Bible-ah hian tam tak a awm a. Mahse, tlem azawng chauh lo tarlang ila, heta tang pawh hian a pawimawhzia hriat itum theuh ang u.
Nu lungngai leh mangang tak mai chu (I Samu 1 : 9) : hani chuan Fa aneih loh avangin alungngai em em a, chumai piahlamah a Mopuinuin hmusit takin ala nuihsan bawksi nen a lungngai em em a ni. Mahse, Pathian hnenah tlu lutin Pathian Biak bukah akal a, Thinlung kehsawm leh lungchhe vankaiin atap a. Lalpa a thutiam a danglam ve ngailo Pathian chuan, aduh leh mamawhte chu lo hriatsakin alo tih hlawhtlinsak ta ni.
Lungrual taka Kohhrante tawngtaina (Tirhkohte 12 : 7) : Ringtu tiaktirte tihduhdahna a nasain an Hruaitute phei chu manin an tihlum hial a, Petera pawh tihlum turin an man a. A kuta Thir khaidiata thlun tlatin tan Inah an khung a, mahse Kohhrante thahnem ngai takin Marka Nu Inah an tawngtai a, an tawngtaina chu chhana awmin Petera chu tanin ata hruaichhuahin a awm a ni. Pathian chu ropui ber rawhse.
Mi luhlul leh Misualte laka himna (II Thess 3 : 1-3) : Tirkoh chuan ‘Misualte leh Mi luhlulte laka ka himtheihnan mi tawngtaisak rawh u......Lalpa chu a rinawmin Misual lakak chuan a humhim angche u. tawngtaina hi kan Phaw leh kan inhumhimna a ni’ tih Tirkoh hian ava hre tak em.
Tawngtaina hi pathian tan Rimtui a ni (Tirh 10 : 4) : ‘Korneli, i tawngtainate kha Pathian hnenah hriatreng turin athlengchho ta’ tih vantirkohin ahrilh hi a lawmawmin ava thlamuanthlak dawn tak em. Mi Pathian hnena tih takzeta a tawngtai chuan Pathian tan Rimtui leh hriatreng tlak a ni thin. Ava thlamuanthlak tak em.
Damlorte tan damna leh ramhuaite hnehna a ni (Mark 9 : 25....) : ‘Zirtirtu engatinge keinin kan hnawhchhuah theihloh’. heng hi tawngtaina chauhlo chuan atih theihloh, kan rinna tinghet tur leh kan rinhlelhna tibo tur leh kan thiltihtheihna hmanraw pawimawih ber chu tawngtaina hi a ni.
Lungchhir leh beidawng ngawih ngawihte tana beiseina nung siamtu (Rorel 16 : 28) : Lungchhirna leh beidawn ngawih ngawihna i nei em? Rilru hahin Pathian pawhin ensan tawh hial chein i inhria em? Pathian hnenah lungchhirin a zahngaihna dilin Samsona ang hian tawngtaiin han tlu lut leh zawk teh. Kawlphe anga rangin anin alo chhang vat ang che.
Awle, Tawngtainain thil atihtheizia leh a hlawhtlinna tlem azawng kan tarlan atang pawh hian a pawimawh zia chu a hriat awm e. tawngtai hi Pathian thinlung kan kik hawnna, pathian kan zawnhmuhna, kan duhzawng leh mamawh kan neih theihna, Ringlo Mite thinlung auhchimna, Damlote damna, Ram leh hnam damnate leh pathian nena kan inzawmna khaidiat nghet tak a ni. Pathian chuan ‘thlarau chuan rum sawi hleih theihloh intan atawngtaisak reng che u a ni’ ati a ni.
Pathian hnena kan tawngtaina a hlawhtlin theihna tur erawh kan hriatreng atha. Kan Bible chang tarlan ang khan ‘Ka hmingpu ka Mite chuan inngaitlawma an tawngtai a, min zawn a, an awmdan sualte an hawisan chuan, van atangin ka lo ngaithla anga, an sualte ka ngaidam anga, an Ram chu ka tidam leh ang. He hmuna tawngtainaah hian ka Mit ka len anga, ka Beng ka chhi ang’ tiin min tiam anih kha. Lalpa’n athu malsawm rawhse.

(kan ngenna ngai pawimawha Sermon tha tak mai min rawn ziahsak avangin kan lawm e. Pathianin malsawm zel che rawhse. Edtr.)