Article

TLAI NGAILO LALPA -Tetea Sailo
Mihringte hi Pathian in kan chunga ro a relnaah hian kan hmanhmawh fo thin a. Keimahni hamthatna leh nawmsakna kan thlakhlelh luat avang hian Pathian hi tlai thinah kan ngai fo thin. Pathian hnathawh leh thiltihte kan nghah hman loh avangin keimahni duh danin chak takin kan kal a, kan dai phelh pheng phung reng a ni. Amaherawhchu Pathian hi a tlai ngai lova, a hun takah A ropuina leh thiltihtheihna a lanchhuah tir zawk thin. Amah beiseia A chunga rinna nghat thin tute hi a tithlawn ngai lo a ni. Huaisen taka Amah tantu leh Amaha rinna zawng zawng nghattute tana a rinawmzia chu Daniela leh a thiante chungchangah pawh chiang takin kan hmu a ni.
Daniala Bung 3 kan chhiar chuan Lal Nebukadnezzara'n rangkachak milim a siamthu leh chu milim chu mi zawng zawngin chibai buka be turin thuchhuah a siam a ni tih kan hmu a. Amaherawhchu Daniala thiante pathum Sadraka, Mesaka leh Abednego te chuan Pathian nung hawisan duh lovin lal thu pek anga milim hmaa kun chu an duh ta lova, chu chuan lal Nebukadnezzara thin a tirimin a milem chibai buk duh lote hremna tura dan a lo siam tawh angin rawhtuina meipuiah Daniala leh athiante chu an paih ta a ni tih kan hmu a. Mihring rilru atanga kan ngaihtuah chuan Sadraka, Mesaka leh Abednago te rawhtuina meipui, alet sarih laia an tihsat leh nghal chhunga an paih thlenga Pathian a che lo kha a mak a, a tlai tawh lutuk a ni. Engkimtithei Pathian chuan meipui sa tak chu a tihlum thei awm si a, meipuia paihtu tur sipai hote tha pawh a ti zawi vek thei ang tih a rinawm a, Daniala thiante kha meipuia paih an nih hma khan chhahchhuah an ni thei a ni. Amaherawhchu chu chu Pathian thiltum leh ruahman dan a ni lova, Amah leh Daniala thiante ho tana hlawk zawka Nebukadnezzara hremna chu hmag turin tumdan dang a lo nei daih a ni. Chu a thiltum ang ngei chuan a hun takah Daniala thiante chu meipui chhungah ngei chuan chhanchhuah in an awm a, engmah na hre lovin an awm a ni. Tlai deuh tawh leh engmah tih theih tawh loh hnu ni a langa mihringin a tawrh tur ang hun thlen tawh a Pathian thiltihtheihna lang chhuak chu Daniala thiante tan malsawmna a ni a, an hna atanga kaisan tir an nih phah ta a ni.
Daniala Sakeibaknei puka paih a nih pawh khan mihring ngaihtuahna atang chuan Pathian kha tlai hle in a lang a. Sakeibaknei puk thleng lovin Daniala harsatna kha Sakeibaknei puk kotlangah khan chinfel mai awm ti in keini chuan kan ngaihtuah ngei ang. A puk kotlang thlenga Pathian in a thiltihtheihna a lantir lo a nih chuan Sakeibaknei puk a lut lova Pathian thiltihtheihna leh a ruahmanna nghak hman lova keimahni thua chet lak mai kan tum ngei ang. Mahse, Pathian tana rinawm Daniala chuan Pathian a ring tlat a, a hun takah Pathian in hna a thawk ta reng a ni. Daniala kha thi ngei tura kan ngaihna tur hmun Sakeibaknei ko ham tak tak te pukah Pathian chuan a muttir thei tlat si a ni. Daniala'n rinna nena Pathian thil ruahmanna a nghah avang khan Nebukadnezzara khan Daniala Pathian, kan Pathian nung ngei chu a biak ve phah ta a nih kha. Kan rin Pathian hi a va tlai ngailo tak em! A hun takah thil a lo ti thin zawk a ni. Ringtu inti tamtakte hian Pathian hi kan ring zo lo fo thin a, Amah kan rin loh avang hian a hnathawh lo thlen hmain kan lo phatsan fo thin. A malsawmna kan dil a, a chhanna kan hmuh hmain hmanhmawh takin kan duh angin kan lo chet khalh a, nupui pasal te pawh kan dil a min pek hma in kan lo inru fo thin a nih hi. Hei hi kan rinna duap lutuk vang a ni. Amah ringtute chunga Pathian hnathawh kan hmuh hian Pathian tlai ngai lohzia kan hmu a, keimahni kan hmanhmawh lutuk avang hian a tlai thinah ah kan lo ruat mai mai thin zawk a lo ni.
Hawh u, Daniala leh a thiante ang hian Lalpa hnathawh lo thleng tur chu rinawm takin i nghak thin teh ang u, 'min chhanchhuak dawnlo mahsela, milem pathian chibai ka buk lovang' ti ngam khawpa Amah ringtu leh beiseitu hi Pathian hian a ensan mai mai ngai lo. Tlai ngailo Pathian hian kan thatna turin kawng engkim min ruahman saka, kan dilna leh ngennate min chhang tur hian a tlai ngai love.