Article

RINAWMNA
-K.Mpa
Philippi kohhran hi paula zin vawihnihna a Lalpa Thlarau kohna a din a ni. Paula thusawi an dawngfuh a, Mi tam tak an piangthar a, Nula aienthiam zawl kawchhunga ramhuai hnawhchhuah avangin Lunginah an tan tir a, Thingkawllian tak an buntir a ni. Chu Lungin chhunga atang chu Lalpa Thlarauin Krista chanchintha hrilna remchangah ahman tir ta zawk hloh a ni.
Philipi anluhtirh atanga Rome-a an tantir ni thleng khan Philipi Kohhran hian Paula hi an ngainat zia ahriat a ni. Thessalonika khua a rawng abawl lai pawhin Philippi kohhran hian tanpuina vawihnih lai an thawn nghe nghe a ni. Rom Lungina atan lai hian tanpuina tur thawhlawm an khawn leh a, mahse, tanpuina pe tur hian Tuipui leh Mel za tam tak kaltlang angai a, thawhlawm awmsa pawh chu pek mai harsa tak a ni. Tlangval fel tak, Ka Sipai pui, Ka Unaupa, Ka hnathawhpui, intirhkoh, ka tlakchhama min chhawmdawltu, ti hial a, akoh Epaphrodita-a chuan a peta a, amaherawhchu, akalkawng athui em avang chuan achau aniang, thichhawngin ana ta a, Philippi kohhran leh Paula chu an rilru ahah hle a ni. Paula’n Philippi kohhrante achunga an thatzia leh an hmangaihnate leh an rinawmzia ahmuh chuan a rilru a khawih hle a, lawmthute leh fuihna thute leh an awmdan chu Krista chanchintha nen inmawi zel tura fuihna thute a thawn a ni.

Awle Zoram Kohhran tinte hi engtinnge min ngaih ve ang le. A Kohhran rawngbawlna ang chuan chhe lutuk chuan kan langlo pawh ani mai thei. Amaherawhchu, kan chet duhdante leh Biakin pawn lama kan nungchangte hian Krista chanchintha a mawi em? Tunhma chuan Zoramah hian Tualthah, pawngsual, Uire, insuam leh rukruk sawi tur avang hle anih kha. Mahse, tunah chuan ram roreltuahte leh Kohhran chhungte pawh min luhchhuah ta vek mai anih hi. Ava lungchhiatthlak tak em. Tunhma a Contractor leh Dawrkai hausate ta bik tura kan ngaih thin, Motor leh Concrete Building-te pawh Sawrkar hnachhete thawkte pawhin an nei ve ta fur mai. Hengte hi an thlabi hlawh ngawt chuan an leitheilo ang tih hi a chiangreng mai a ni. Mahse chuti chung chuan kan Pathian thusawite leh kan Ban vai vel pawh amawi viau chu ani mai thei e. Amaherawhchu kan awmdan leh Krista chanchintha chu a inmawi ta silo a ni. Paula’n min rawn hmu ve tase engtintak min ngai angmaw? Sawrkar Motorin kan inkhawm thei a, anuamin ahahdam viau pawh a ni thei, mahse, Krista chanchintha nen chuan a inmawi thin silo. Thil pawi berte zing ami a ni.
Hman deuh lawk khan Pastor tanglai pakhat chu a thiante’n ahriatloh laiin LOAN cheng Nuaisawm lak theihna an lo siamsak a. A Inah anva kal a, “hetah hian i hming sign la, Nuaisawm ila chhuak anga, Nuaisarih chu i Deposit anga, Nuaithum chu i ei hmiah thei dawn a ni,” an ti a. Ani chuan “kala lo zawk mai ange, Ka sign-lo zawk mai ang,” alo ti a. a thiante chuan mak anti hle a ni. Kan rawngbawltute pawh hi he Pastor ang hian hnawl ngam vek tase, Lalpa Thlarauin min chenchilh anga, tun aiin an rawngbawlnate pawh anung zawk ngei ang.
Zoram Missionary SAP lo chhuak hmasate, Pu Buanga leh Sap Upate kha, Kohhran hoin Serkawnah an In tur an saksak a. Mahse an sakzawh hnu chuan aluahdan turah anbuai ta tlat mai. chu an buaina chu a Naupang zawkin, “a upa zawkin duhthlang rawhse,” ati tlat a, a Upa zawk lah chuan, “Naupang zawkin alawm thlang thin,” alo ti ve tlat bawk si a. A tawpah Kohhran hote chuan thum vawrin an tih felsak ta a ni. A mawiin anva entawntlak tak em. Tunah chuan Miin atha chang rawhse tih chu khawilam! Inneih thatte leh Motor neihthatte hi kan intlansiakna ani ringawt ta si a, Krista chanchintha nen a inmawilo ta hle awm e. Peter-a chuan heti hian Kohhran Upate awmdan tur min hrilh a ni. “ In zinga Kohhran Upate chu, kei, in upatpui, Krista tuarnate hretu, ropuina lo lang tur chang vetu tur hian ka fuih ache u, tihtur avang niloin Pathian thu anga chak chung zawkin, hlepna bawlhlawh duh vang ni hek loin, Kohhran ho entawnah insiam zawk rawh u,” tiin min fuih a ni. (I Peter 5 : 1-3)
A tawp ber atan chuan Bible-in Corruption atih hi chu eirukna sual ngawt ani lova, Milem biakna, Uirena, Inngaihna, Tualthahna-te an ni a, hei vang hian heng sualna zawng zawng lak atang hian in tithianghlimin Krista chanchintha nen a inmawi zawkin i awm ang u. Lal Isua chuan, “Kung zawng zawng ka Pa vana mi phunloh chu pawhchhuah vek an ni ang,” ati si a.