biak In chhung nungchang

Biakin hi a zahawm em em a Biakin zahawm na tehi kan vawnghim fo tur a ni, chumi tur chuan heng te hi kan hriat a pawimawh:-

1. Thlalak chungchang : Thlalak hi tih zalen lutuk tur a nilo, inkhawmlai a thlala tur mipui hma a vei sek hian inkhawm ati dal thei hle, thlalak atul anih pawhin, kan thlalak tur te lanchian tur nalai tur ah thut hmun lo rem lawk hi a fin thlak hle. Heng nauhlan, sipaia lakluh zaipawl zai, solo etc..te hi Platform a, an awmlai tak thin anih avangin a lam chian nalai tur ah thuthmun lo rem mai kha atha ani

2. Sap hlasak: Hnamdang awm mang si lova mizo hlir inkhawm na a sap hla sak tlat pawh hi athatna a awm vaklo, thiam entir na lam akawk in alanga mahni tawng ngei a inkhawm zawng zawng te hriat theih a Pathian fakna hla han sak hi a ropui ani. Thlarau lam tan hlawkna a awm teh chiamlo.

3. Thupuan chung chang: Inkhawmnaah hian hunruatna te leh Corps a sipai te hriat tur thil pawimawh tak tak puan ani thin a, heng thupuante hi ngun takin kan ngaithlain, kan vawng tur a ni a, ahnuah engmah pawh ka lo hre hleinem tih leh mai mai tur anilo thupuan atang a chanvo/tihtur kan nei ve anih phei chuan kan chhinchhiah nghal thlap tur a ni

4. Inkhawm chhunga awmdan tur: Inkhawm chhung hi dan naran in darkar khat vel ani a, hemi chhung hi chuan mahni pawh tha taka inthunun thin tur a ni. kan inthunun theilo lutuk hian Pathian zahlohna akawk a, kan inkhawm pawh in keimahniah awm zia aneih loh phah thin a ni, Biakin hi sawi tawh angin Pathian pawl na hmun a ni a, Pathian chu kan bulah a awm a, amah chu fakin thu leh hlain kan pawl dawn a ni. chuvangin inkhawm laia hawikual vak vakte, bul ami te biak sur surte, chet chette, nuih vur vurte hi athalo em em a, sehrep dang dang seh te phei hi chu a mawilo em em a, mobile phone khawih te Pathian zahlohna a ni a, inthlahdah avangin hengte hi kanlo ti leh mai thin a, Inkhawm chhung hi chuan atih a tih hauh loh tur a ni.

5. Mutthluk: Inkhawm laia mutthluk hi thil thalo tak mai a ni bawk a, Pathian hma a muthlu kan ni a, amah kan ngaihsaklo tihna ani. Officer lian hma a kan awm in kan muthilhsan ngailo a, lei leh van siam tu engkim a engkim, ama biakbuk chhung ngeia kan han muthilhsan hi chu chin loh tawp tur a ni.

6. Inkhawm hrang hrang: Hei hian hun dang dang hunbik nei inkhawm a kawklo a. Chawlhkar khat a inkhawm hrang hrang bik, Thalai inkhawm, nilai zan(Sipai inkhawm), Inrinni zan(Tawngtai inkhawm), Pathianni zing (thianghlim inkhawm) leh Pathianni zan(Chhandam inkhawm)te hi akawk bika, henghian tum bik anei theuh a, hla te pawh hunbik mil deuh a thlan te,Bible Sermon tepawh hetiang lam hawi ngaihthlak nise atha hle, kan rilru pawhin hetiang lamhawi hi kawk deuh bikse.

7. Lalpa tawngtaina : Mizoramah chuan Lalpa tawngtai na hi inkhawm apiang tih theihah inkhawm tih tawp nan kan hmang atih theih a, atha khawp mai mahse tamtak hi chuan dan ang maiin kan chham liam mai mai thin nite pawhin alang a, apawi hle ani.

8. Pathian chawimawina : Biak In hi Pathian chawimawina hmun a ni a. Pathian kan chawimawi theih dan tha tak pakhat chu hlasak hi a ni. Bible chuan fakna hlate, Pathian hlate, thlarau lam hlate a Pathian chawimawi a in pawl khawm turin min hrilh a. Sam ziaktu chuan engkim thaw thei tawh phawt chuan Lalpa chu fak rawh se a tih kha, hlim tak a zai ho hian kan thlarau lam nun a chawikang a,Pathian lam min hawitir bawk a, inkhawm chhung zawng boruak tha tak kan hip tlang thei thin a ni, hlasak hi mitinin Pathian kan chawimawi theih dan a ni a. Harhna athlen laite pawh hian Pathian hla leh thlarau lam hlasak hi kan ning thei thinlo. Chuvangin inkhawmnaah Pathian chawi mawi nana hlasak leh zaiho tehi kan tih fo tur ani.

Awle tuntum atanchuan tawk rih phawt maise heng kan sawi bakah heng aia pawi mawh pawh hi tam tak ala awm thei ang, mahse tuntum atan chuan tawk rih phawt maise, heng kan han sawite hi a theih ang chen chenah zawm hram i tum ang u.