Kan Bible chang tarlan (Luka 5:4-7) ah khan Isuan, Simon-a hnenah, “Li thuk lam pan la, sangha man turin lente deng rawh,” a ti a. Simona’n ahnial ve tlat, “Zirtirtu, rimtakin zankhua in kan bei a, engmah kan man lova, nimahsela, i thuin lente kan deng leh ange,” a ti a.
Tunlai ringtu zingah hian mahni remhriat leh finna te, chakna te hmanga Lalpa rawngbawl tam tak kan awm a. Chung mite chuan rimtak leh hahtakin, thahnemngai takin beimah ila, (Sangha) Thlarau bo man miah lovin hunrei tak Lalpa rawngbawlin kan awm thin. Amaherawhchu, Lalpa thu ngaichang a, Lalpa’n ti tura a ruat anga kan thawh chinah chuan Thlarau bo tam tak kan man dawn a ni. Simon-a pawhin Lalpa thu a len a den chinah chuan, len in a dawl loh khawp Sangha a man ta a nih kha.
“Li thuk lam pan,” a tih hian hmun nuam leh hlimawm lam a kawk lova, hmun kilkhawr zawk leh ralti zawk te, hmun hrehawm lai ber te, zu hmun sa hmun a cheng te, ruihhlo ngai te, humsual dai te, rahbi tleu tawh te, mirethei ber berte a huam a ni. Kan pasaltha kal hmasa tepawh kan ngaihtuah chuan an rawngbawlna kha hmun nuam lai reng a awm lo, hmun hrehawm leh kilkhawr ber te an hrut a nih kha. Chutiang a nih avang chuan Thlarau bo sang tam tak Lalpa hnen an hruai thleng a, a va han ropui em!! Lalpa min kohna zawnah kal lovin, min koh loh na lamah te pengin kan kal fo thin hian rawngbawlna a ti chak thei lova, achhiat phah fo thin a ni. Vawiin-ah hian Lalpa’n eng ti turin nge min koh kan tih chuan Isaia 61:1-3 chuan, “Thinlung lungchhiate tuam tur te, salte hnena chhuahna thu leh mitangte hnena chhuahna thu leh mitangte hnena tan in hawn lehna thu sawi tur te, Lalpa lungawi kum thu sawi tur te in min tir a ni,” Hei hi Isua rawngbawl dan tur sawi lawkna a ni na a, a zuitute hna a ni tho, a hniakhnung zuitu kan ni si a, chutiang a lo nih si chuan, kan Pathian duh dan leh thu angte hian rawng kan va bawl lo thin awm em!! Khawvel tukverh-ah kan dak a, khawvel thil chi hrang hrangte kan thlir, chu chuan Lalpa rawngbawl thei lo turin min bawih bet tlat a lo ni. Hei hi Lalpa lawmzawng leh duhdan a ni lo tih i hre thar leh ang u.
Matthaia 7:22 ah chuan rimtaka thawka chanchin tha vahvaih pui a, Lalpa hminga thil mak tam tak ti thin tepawh kha, Lalpa’n a hriatpui an nih loh chuan Lalpa ngaih chuan thil sual ti tu te, Lalpa hriat ngai loh an lo ni der mai. An thawhrimna leh an hahna te chu a thlawn mai a lo ni ta. Chuvangin, Lalpa mi hriat, Lalpa malsawm tlak, Lalpa lawm zawng mi ni thei turin in buatsaih thar leh ang u. Tichuan, Lalpa hnenah Thlarau bo tam tak kan hruai thei dawn a lo ni. I khup te lo zawi tawh in, i ban te lo uaithla tawhin, beidawnna leh lungngaihna in lo tuam thin tawh che mahse, beiseina thar nen Lalpa pan la, i tlinlohna leh fel lohna, i fin lohna te zawng zawng hai der a, i natna te pawh phurtu chuan inchhira ahnen i pan chuan tlingah a pawm ang che. Malsawmna chhiarsen lohin a vur ang che. Tui pawnlang te te ah Sangha man tura awm lo ang hian hmun nuam leh awl ai chin ah chuan Thlarau bo man tam tur an awm lo. Li thuk lam pan a kan len(Pathian thu leh tawngtaina) hmangin Thlarau bo tam tak kan man thei dawn a lo ni. Kan chakna ni lovin, Lalpa chakna ringin li thuk lam pan in lente i’n deng tha leh teh ang u.
Lalpa’n a thu kan za atan malsawm rawh se, Amen.
No comments:
Post a Comment