TAWNGTAINA

- RMS Dawngliana

He Tawngtaina hian khawvel a harsatna hrang hrang tawk mek, damlohna avanga hrehawm tuer ngawih ngawihte, fa te avanga lungngai tak tak te, nu leh pa leh unau te avanga manganna nasa tak tawk te, sum leh pai tlakchham avanga rethei bik ngawih ngawih a in ngai te. Tin, sum leh pai ngah em em, mahse thlamuanna nei chuang reng reng lo te, mahni thil loh tih tawhte avanga sual ngawih ngawih bik a in ngai, khawvel a beisei tur reng reng nei tawh lo a in hria ten he tawngtaina hi an tan malsawmna a lo nih ve hlauh takin tiin ka rawn ziak a ni.

“Aw Lalpa, he khawvel ah hian lei ropuina, mawina leh malsawmna zawng zawngte ka tan hlu hle mahse I hmel min hliah tirtu mai anni si. Tlakchhamna, manganna leh beidawnna ni a ka ngaih zawng zawngte, lei mihring ngaih ah vanduaina tawp ni mahse Lalpa chung zawng zawngte chuan I lam min hnaih tir zawk si. Lei malsawmna ka dil che a, malsawmna chhiarsen loh in min vur a, mahse Lalpa, I malsawmna te hrethiamlo in nangmah hlat nan ka lo hmang a. Khawvela nawmna leh hahchawlhna ka zawn zawng zawngte chuan lungngaih, manganna leh beidawnna ah min thlen tir a. Amaherawhchu, chung zawng zawng lungngaihna, manganna leh beidawnna te chuan nangmah min hriattirin chatuan nun min neihtir zawk si. I rorel dan hi hriatthiam a va har em.... Lunngaihna leh beidawnna neilo ila nang ka chatuan nunna ka nei lo’ng che Lalpa....Nangmah a ka awm reng theih nan kal dan min zirtir la, nangmah ka ngaih ngawih ngawih reng fo theih nan che manganna leh beidawnna te min siam la, manganna leh beidawnnate chuan I vanram min ngaih tir se....heng zawng zawng ka ngaihtuah hian ka mamawh che a ni tih min hriattir si....

Lalpa, ka hahchawlhna leh thlamuanna, innghahna dang beisei tur ka nei lo. Ka pumin nei rawh....ka in hlan e. Khawvel ah hian nangmah chauh hmangaih tur in min pui la, I ram ka thlen hma a ka pen bo loh nan min chelh tlat ang che. Hei erawh ka dil che Lalpa, ka duh ber chu nangmah hriatchian leh thlarau thianghlim....mahse, ka nun hian chu ka dil che chang tur chuan ka taksa te I tan a thianghlim si lo. Nangmah chauh atchilh turin min pui la, mi te tana malsawmna ka nih theih nan nangmah biakna hun tha min siam reng ang che. I duhzawng chauh ka tih theih nan I ropui zia min hriattir fo ang che. Isua Krista hmin in ka dil a che....Amen.